Parvis Analakely – Antananarivo

01 Jona 2026

NOSOKAFANA TAMIN’NY FOMBA OFISIALY NY FANKALAZANA NY FAHA-66 TAONA NIVERENAN’NY FAHALEOVANTENAN’I MADAGASIKARA SY NY FETIN’NY FOLOALINDAHY MALAGASY

Natomboka tamin’ny fomba ofisialy androany teny amin’ny Parvis Analakely ny fankalazana ny faha-66 taona niverenan’ny Fahaleovantenan’i Madagasikara sy ny Fetin’ny Foloalindahy Malagasy, entina eo ambanin’ny lohahevitra hoe : « Fanavaozana ho an’ny Fandrosoan’i Madagasikara ».

Nisongadina nandritra ny lanonana ny fananganan-tsaina sy ny fanomezam-boninahitra ny Sainam-pirenena, niaraka tamin’ny fampahafantarana ny tantarany sy ny fampisehoana ireo sainam-paritra 24 manerana ny Nosy. Nampahatsiahivina ihany koa ireo fitsipika maneho fanajana ny Firenena sy ny soatoavina maha-Malagasy.

Nanome voninahitra ny fotoana ireo manam-pahefana ambony eto amin’ny Firenena, ahitana solontena avy amin’ny Fiadidiana ny Repoblika, ny Governemanta, ny Antenimieram-pirenena ary ireo tompon’andraiki-panjakana isan-tsokajiny.

Nandritra ny lahateniny, ny Mpanolotsaina Avo momba ny Fanavaozana dia nanasongadina ny lanjan’ny soatoavina Malagasy, ny andraikitry ny Foloalindahy amin’ny fiarovana ny Firenena sy ny vahoaka, ary ny maha-zava-dehibe ny teny Malagasy amin’izao fanombohan’ny Volan’ny Teny Malagasy izao.

Ho mariky ny firaisankina sy ny fitiavan-tanindrazana, entanina ny olom-pirenena rehetra handray anjara mavitrika sy amim-pahamendrehana amin’ireo hetsika rehetra mandritra ny fankalazana ny Fetim-pirenena 2026.

« Fanavaozana ho an’ny Fandrosoan’i Madagasikara »