Nosokafana androany teny Ivato ny fikaonandohan’ny Fitsarana izay handraisan’ny fianakaviamben’ny Fitsarana anjara eo amban’ny lohahevitra hoe: » Ny fahefana mpitsara, antoky ny Fanavaozana ho amin’ny fampandrosoana ny firenena ». Voakasika ao anatin’izany ny mpiraki-draharaha, ny mpandraharaha ny fonja, ny mpiraki-tsoratra, ny vadintany.

Olom-panjakana sy olom-boatendry maro no tonga nanome voninahitra ny fotoana. Anisan’izany ireo mpitahiry tombon-kasem-panjakana teo aloha sy ny minisitra amperinasa. Ny Minisitra misahana ny Fanavaozana, Me Hanitra Razafimanantsoa ihany koa dia nanao ho zava-dehibe sy nanome lanja izao fikaonandoha izao.

Nanamarika ny Minisitry ny Fitsarana Fanirisoa Ernaivo raha nandray fitenenana fa ela no niandrasana ity fotoana ity. Natao hitondrana ny Fanavaozana ny rafitry ny Fitsarana sy ny paikady mba hahitan’ny vahoaka fa rafitra miaro azy ny Fitsarana.

Miezaka ny Fitsarana manao antoka ho amin’ny fampandehanana ny firenena, ary manao arofenitra ho an’ny rehetra sy arofanina ho amin’ny fandikan-dalàna.

Takian’ny vahoaka ny fandraisana anjara bebe kokoa amin’ny ady heloka sy ady madio fa indrindra amin’ny ny ady tany. Anisan’ny vahaolana entina ny fiaraha-miasa amin’ny Minisitera isan-karazany izay miandraikitra resaka tany sy ireo mpanao lalàna

Notsipihiny fa io ady tany io no tena mameno ny asa eny amin’ny Fitsarana ankoatra ny tsy fandriampahalemana sy ny ady ara-barotra.

Fahamarinana no tokony ijoroana, tsy misy tombo sy ala. Mila fantatry ny vahoaka fa tsy mitanila ka mitovy ny olona rehetra eo anatrehan’ny Fitsarana

Atao ho laharam-pahamehana ihany koa ny fanamafisana ny ady amin’ny famerenana ny volam-panjakana voahodina, ny fangejana fanjakana, ny tsy fandriampahalemana, ny hala-zaza izay nahazo vahana tato ato.

Haharitra herinandro ity fihaonana ity.

#mcr #Fanavaozana

#fifanajana #FiarahaMientana #fanolorantena