Paikadimpirenena entina miady amin’ny kolikoly na SNLCC 2025-2030: atsahatra ny tsimatimanota

Tontosa teny amin’ny Primatiora Mahazoarivo ny 15 Mey 2026 ny fivorian’ny Komity Mpitantana (COPIL) momba ny fanamarinana ny Drafitra Fanatanterahana (PMO) ny paikadimpirenena entina miady amin’ny kolikoly na Stratégie Nationale de Lutte Contre la Corruption (SNLCC) 2025-2030.

Notarihin’Andriamatoa Praiminisitra ny fivoriana niarahana tamin’ireo tomponandraikitra ambony mpikambana anaty COPIL avy amin’ny CSI, BIANCO, ARAI, Ministera isan-tsokajiny ary ireo mpiara-miombon’antoka amin’ny ady amin’ny kolikoly.

Nisolo tena ny Minisitera misahana ny Fanavaozana ny Tale misahana ny Pacte Moral et Éthique Publique, Atoa Jerry Édouard sy ny Tale misahana ny Fitsirihana anatiny, Atoa Rina Randriamampita.

Teboka lehibe noresahina :

Fampitsaharana ny tsimatimanota amin’ny raharaha kolikoly

Fanamafisana ny fiaraha-miasa sy ny fandrindrana eo amin’ireo rafitra miady amin’ny kolikoly

Fanapariahana ny kolontsain’ny fahitsiana sy ny fahamendrehana

Toromarika sy fanamarihana nataon’Andriamatoa Praiminisitra :

Hampidirina ao anatin’ny PMO ireo mari-pandrefesana iraisam-pirenena momba ny kolikoly

Hamafisina ny fanadihadiana ara-bola amin’ireo raharaha kolikoly

Hatao laharam-pahamehana ireo raharaha misy fiantraikany mivantana amin’ny vahoaka (rano fisotro, herinaratra, fotodrafitrasa, fanabeazana, sns.)

Hametrahana “Dina miady amin’ny kolikoly” eny ifotony

Hatsangana ny Tahirim-bola hiadiana amin’ny kolikoly

Hohamafisina ny fiarovana ireo mpampaneno lakolosy sy mpitory tranga kolikoly

Hodinihina ny fanamafisana ny fanadihadiana momba ny fitondran-tena amin’ny fanendrena ireo tompon’andraikitra ambony eo anivon’ny Fanjakana

Hotanterahina eny amin’ny Mining Business Center Ivato ny 11 sy 12 Jona 2026 ny Atrikasa hanamafisana ny ady amin’ny kolikoly .