Ao anatin’ny fanomanana ny fikaonandoham-pirenena sy ny fanatanterahana ny programan’asan’ny Fanavaozana, dia nitarika dinik’asa teny amin’ny lapan’i Mahazoarivo androany ny Praiminisitra lehiben’ny governemanta Mamitiana Rajaonarison . Nanatrika io fotoana io ny Minisitry ny Atitany sy Fitsinjaram-pahefana Atoa Hanitra Velonjara Tiaray Rakotonandrasana, ny Minisitra misahana ny Fanavaozana Me Hanitra Razafimanantsoa sy ireo mpiara-miasa akaiky aminy, ny Sekretera jeneralin’ny Minisiteran’ny fampiroboroboana ny haitao ara-kajy mirindra, ny paositra sy ny fifandraisan-davitra, ny solontena avy amin’ny Minisiteran’ny Toekarena sy ny Fitantanam-bola.

Iraka roa lehibe no nankinina tamin’ny governemanta hoy ny Praiminisitra dia ny hamaly ny filàna maikan’ny mponina ary ny faharoa kosa dia ny fanatanterahana ny programan’asan’ny Fanavaozana.

Izao fihaonana izao araka izany no nentina nandrindrana ny fomba hoentina manatanteraka ny fanavaozana sy ny asa manandrify ny departemanta tsirairay.

Ny lalantsaina entina miasa dia mifototra indrindra amin’ny fampandehanan-draharaha maika, ny vokany amin’ny vahoaka ary ny fahaizana mitondra zava-baovao sy mampivoatra.

Ny fikaonandoha no dingana voalohany ao anatin’ny fanavaozana ary hihainoana ny hevitry ny olom-pirenena ary koa hahafahany miteny malalaka. Nohamafisina noho izany ny fomba fiasa mampiaty hampandraisana anjara ny malagasy sy ny mponina rehetra araka ny fanazavana nentin’ny Minisitra misahana ny Fanavaozana.

Notsipihana ihany koa ny fanomezan-danja ny kolontsainan’ny faritra tsirairay amin’ny fotoana fanantarehana ny fikaonandoha.

Tanjona ao anatin’izao fanavaozana izao ny hamerenana ny fifampitokisana sy ny hanatsarana ny fifandraisana eo amin’ny mpitondra sy ny vahoaka hisian’ny fiaraha-monina mirindra.

Dingana ao anatin’ny fanavaozana ihany koa ny fanavaozana ny fitantanana ny fifidianana, ny fitsapan-kevi-bahoaka hifidianana ny Lalàmpanorenana hifehy ny Repoblika faha-5 ary ireo fifidianana samihafa hotanterahana eto amin’ny firenena.

Mandritra ireo fotoana ireo anefa dia hanana ny anjara andraikiny koa ireo vovonanana mpanara-maso eny anivon’ny Minisitera tsirairay.

#mcr#Fanavaozana#fikaonandohampirenena

#fifanajana#FiarahaMientana#Finiavana