Notohizana tamin’ny fivoriana an-kalamanjana niarahana tamin’ny vahoaka ny lanonana fametrahana amin’ny fomba ofisialy ny Talem-paritra Misahana ny Fanavaozana tao Alaotra Mangoro. Tamin’io fotoana io no nitondran’ny Minisitra Misahana ny Fanavaozana,Me Hanitra Razafimanantsoa fanazavana sy fanentanana momba ny Fanavaozana sy ny Fikaonandoham-pirenena.

Nandritra ny lahateniny dia nanamafy ny Minisitra fa:

« Miankina aminao, miankina amintsika ny Fanavaozana. Raha tsy manomboka amintsika izany dia zava-poana ny ezaka rehetra ataon’ny fitondram-panjakana tarihin’ny Filohan’ny Fanavaozana, ny Kolonely Michaël Randrianirina. »

Nasongadiny fa anisan’ny fototry ny Fanavaozana ny famerenana ny fifampitokisana eo amin’ny mpitondra sy ny vahoaka, ary ny fanarenana ny fihavanana, izay soatoavina mampiray sy mampandroso ny firenena.

Mikasika ny Fikaonandoham-pirenena, dia nambarany fa efa vita avokoa ny fanomanana ara-teknika, ka ny FFKM no hitarika ny fizotran’izany, raha ny Primatiora kosa no miandraikitra ny lafiny ara-bola.

Nohamafisiny fa tsy maintsy miainga eny ifotony ny Fanavaozana, ka avela haneho ny heviny ny vahoaka mba hahafahan’ny fitondram-panjakana mahafantatra sy mamaha ireo tena olana sedrain’ny olom-pirenena.

« Raha te hanova ny fiainantsika isika dia mandray anjara amin’ny Fikaonandoham-pirenena. »

Nomarihiny ihany koa fa ampahany amin’ny Fanavaozana ihany ny Fikaonandoham-pirenena, satria maro ireo asa hafa tanterahina ao anatin’izany, toy ny fanavaozana ny raharaham-panjakana, ny fanatsarana ny rafitra ary ny fanamafisana ny fitantanana ny firenena, ho fanorenana Repoblika matanjaka, mangarahara ary akaiky vahoaka.

Anisan’ny tanjona amin’ny fametrahana Talem-paritra toy izao

Ny fanakaikezan’ny Minisitera misahana ny Fanavaozana ny vahoaka

Ny fanamafisana ny fiaraha-miasa eo amin’ny Fanjakana sy ny olom-pirenena amin’ny fanorenana Repoblika vaovao.

Ny fanentanana ny fandraisana anjara mavitrika amin’ny Fikaonandoham-pirenena sy ny fanavaozana ny Firenena.

#MCR#Fanavaozana