𝐅𝐚𝐧𝐚𝐯𝐚𝐨𝐳𝐚𝐧𝐚 𝐧𝐲 𝐥𝐢𝐬𝐢-𝐩𝐢𝐟𝐢𝐝𝐢𝐚𝐧𝐚𝐧𝐚 𝐬𝐲 𝐟𝐚𝐧𝐚𝐭𝐬𝐚𝐫𝐚𝐧𝐚 𝐧𝐲 𝐟𝐢𝐤𝐚𝐫𝐚𝐤𝐚𝐫𝐚𝐧𝐚 𝐧𝐲 𝐟𝐢𝐟𝐢𝐝𝐢𝐚𝐧𝐚𝐧𝐚

Notanterahina ny 08 Jolay 2026 ny Sehatra Fifampidinihana teo anivon’ny CENI Antsirabe II, notarihin-dRamatoa Tonia-paritry ny Vaomieram-pirenena Mahaleo tena misahana ny Fifidianana (CENI).

Nandritra izany no nanasana ny Talem-paritra Misahana ny Fanavaozana Vakinankaratra Rtoa Rajaonarivony Tantely Nirina , ka nararaotina ihany koa ny fihaonana tamin’ireo Ben’ny Tanàna 20 ao amin’ny Distrikan’Antsirabe II. Nifampidinihana ny fanamafisana ny fiaraha-miasa amin’ny fidinana ifotony ho fampahafantarana sy famporisihana ny olom-pirenena handray anjara mavitrika amin’ny Fikaonandoham-pirenena, izay hotanterahin’ny FFKM. Naneho ny fahavononany hiara-hiasa sy hanohana izany dingana izany ireo Ben’ny Tanàna rehetra tonga nanatrika.

Nandritra ny valan-dresaka ho an’ny mpanao gazety, niarahana tamin’ny TVM, dia nohamafisin’ny Talem-paritra misahana ny Fanavaozana Vakinankaratra fa hanohy ny fanohanana ara-teknika omen’ny Ministera misahana ny Fanavaozana, amin’ny alalan’ny Fitaleavam-paritra, ho an’ny FFKM, mba hiantohana ny fahombiazan’ny fanatanterahana ny Fikaonandoham-pirenena.

Mihamafy ny fiaraha-miasan’ny CENI, ny Ministera Misahana ny Fanavaozana, ny FFKM ary ny vondrom-bahoaka ifotony, ka manamora ny fandraisan’anjaran’ny olom-pirenena sy ny fahombiazan’ny Fikaonandoham-pirenena.

#MCR#Fanavaozana