Ho fangataham-pitahiana ho an’ny firenena sy ny vahoaka malagasy amin’izao ankatoky ny Fetim-pirenena izao dia nisy ny fanompoam-pivavahana iraisam-pinoana, notarihin’ny Fiombonan’ireo Fiangonana Kristiana eto Madagasikara (FFKM), teny amin’ny EEM Trinite Masina Avaratranjoma, ny Alahady 21 jona 2026.

Nanotrona sy niara-niombom-bavaka tamin’izany ny Filohan’ny Fanavaozana ny Repoblikan’i Madagasikara, ny Kolonely RANDRIANIRINA Michaël, niaraka tamin’ny Mpanolotsaina Avo eo anivon’ny Fanavaozana, ny Jeneraly ZAFITASONDRY Ranoelson Marcellin.

Nanatrika izany fotoam-bavaka izany ihany koa ny Tale Jeneralin’ny Teti-pivoarana Stratejika eo anivon’ny Minisiteran’ny Foloalindahy, ny Jeneraly ROBENARIMANGASON Herimamy, sy ireo tompon’andraikitra ambony eo anivon’ny Minisiteran’ny Foloalindahy ary ny Hery Fiarovana sy Filaminana, niaraka tamin’ireo solontena avy amin’ireo minisitera samihafa sy ny mpikambana ao amin’ny Komitim-pirenena Mpanomana ny Fankalazana ny Fetim-pirenena.

Nifantoka tamin’ny fangataham-pitahiana ho an’ny firenena, ny firaisankinam-pirenena ary ny fampanjakana maharitra ny fandriampahalemana sy ny fandrosoana ny vavaka natao nandritra ity fotoana ity.

Nankasitraka sy nisaotra an’ireo Filoham-piangonana efatra mirahalahy eo anivon’ny FFKM sy ny Mpitandrina ny Filohan’ny Fanavaozana ny Repoblikan’i Madagasikara nandritra ny lahateniny. Nankahery azy ireo ihany koa izy amin’ny asa fanabeazana ara-panahy sy fitaizana ny mpino sahanin’izy ireo, ary nankasitraka ny fandraisan’izy ireo anjara amin’ny fitarihana ny fikaonan-doham-pirenena ho tombontsoan’ny firenena.